Kushtet e përdorimit

Shërbimi

PlutonAi e lidh numrin e WhatsApp-it, faqen në Facebook (Messenger) dhe llogarinë në Instagram të biznesit me një asistent virtual, që u përgjigjet klientëve nga katalogu dhe informatat e biznesit, merr porosi dhe ia kalon bisedën stafit, dhe me një kuti mesazhesh ku stafi përgjigjet. Plani, çmimi dhe kufijtë caktohen në ofertë ose në marrëveshje.

Detyrimet e biznesit

• Lidh vetëm faqe, llogari në Instagram dhe numra WhatsApp që i zotëron ose i administron, dhe i mban të sigurta qasjet e veta në Meta dhe në panel.
• Respekton kushtet dhe politikat e Meta-s, si dhe ligjet për konsumatorët, tregtinë dhe të dhënat personale.
• Mban të sakta katalogun, çmimet, stokun dhe informatat që i jep asistentit: asistenti përgjigjet prej tyre.
• Ka kushtet e veta të shitjes dhe njoftimin e vet të privatësisë për klientët e tij. Për të dhënat e klientëve të tij biznesi është kontrollues, Pluton përpunues.
• Ia paguan drejtpërdrejt Meta-s tarifat e WhatsApp-it, kur ka të tilla.
• Nuk dërgon spam, mesazhe reklamuese të padëshiruara ose përmbajtje të paligjshme.

Asistenti dhe stafi

Përgjigjet e asistentit i shkruan inteligjenca artificiale dhe mund të kenë gabime. Asistenti ia kalon bisedën stafit kur nuk është i sigurt ose kur klienti kërkon një person, dhe stafi mund ta marrë bisedën në çdo kohë. Biznesi mbetet përgjegjës për atë që u thuhet klientëve të tij dhe për porositë që pranon: kontrollojini porositë para se t'i dërgoni.

Rregullat e Meta-s

• Në Facebook (Messenger) dhe Instagram, përgjigjet lejohen brenda 24 orëve nga mesazhi i fundit i klientit. Pas tyre, stafi mund të përgjigjet deri në 7 ditë vetëm kur Meta e lejon etiketën “Human Agent” për PlutonAi.
• Në WhatsApp, pas 24 orëve mund të dërgohen vetëm shabllone të aprovuara nga Meta, të cilat Meta i faturon.
• PlutonAi nuk dërgon mesazhe reklamuese. Meta mund t'i kufizojë ose t'i bllokojë llogaritë sipas rregullave të veta; Pluton nuk përgjigjet për vendimet ose ndërprerjet e Meta-s.

Disponueshmëria

Synojmë që shërbimi të punojë pa ndërprerje, por nuk mund ta garantojmë. Mirëmbajtjen e planifikuar e bëjmë kur ka pak lëvizje dhe e njoftojmë kur ndikon në punë. Ndërprerjet e Meta-s, të ofruesve të inteligjencës artificiale ose të internetit nuk varen nga ne; kur asistenti nuk mund të përgjigjet, biseda i kalon stafit.

Të dhënat

Pluton i përpunon të dhënat e klientëve të biznesit vetëm për të ofruar shërbimin, siç e shpjegon politika e privatësisë. Biznesi mund të kërkojë në çdo kohë një kopje ose fshirjen e tyre. Kur shërbimi përfundon, të dhënat fshihen brenda 30 ditëve.

Përgjegjësia

Për aq sa e lejon ligji, Pluton nuk përgjigjet për fitim të humbur ose dëme të tërthorta, as për përmbajtjen që shkruan stafi i biznesit, as për shërbimet e Meta-s dhe të ofruesve të inteligjencës artificiale. Përgjegjësia e përgjithshme e Pluton kufizohet në shumën që biznesi ka paguar për PlutonAi në 3 muajt para ngjarjes. Kjo nuk e kufizon përgjegjësinë për dëmet e shkaktuara me qëllim ose nga pakujdesia e rëndë.

Pezullimi dhe përfundimi

Secila palë mund ta përfundojë shërbimin sipas ofertës ose marrëveshjes. Pluton mund ta pezullojë qasjen, pasi ta njoftojë biznesin, kur shërbimi keqpërdoret, kur shkelen kushtet e Meta-s, kur faturat mbeten pa u paguar, ose kur Meta e kërkon.

Ndryshimet dhe ligji

Ndryshimet i publikojmë këtu dhe i njoftojmë bizneset me email para se të hyjnë në fuqi. Për këto kushte vlen ligji i Republikës së Kosovës.

Kontakti

ThePluton Studio L.L.C., NUI 812461052, Tirana 2, Prishtinë 10000, Kosovë. Email: hello@pluton.studio · Telefon: +383 49 200 124.